تجربتي في الحصول على الفيزا من ‏اسطنبول‬

تجربتي في الحصول على الفيزا الشنغن من اسطنبول : تجربة شخصية

اهمية الموضوع هي بسبب كثرة السائلين عن طريقة الحصول على الفيزا شنغن الى المانيا من مدينة اسطنبول التركية .

كل المعلومات التي سترد في الموضوع هي فقط عن اسطنبول و أي استفسار نتمنى ان يكتب بالتعليقات 

-من قبل لمّا بلشت أشتغل عالفيزا كنت بتمنى لاقي حدا كاتب بهالتفصيل.

فكتبت بالتفصيل الممل عن كلشي وحطيت صور لأماكن مهمة و بتمنى كون عم فيد غيري وما كون عم كتّر حكي لأن حاسس هيك بوفر عليكوا وقت.
-ملاحظة :يوجد إضافات آخر البوست .

+حجزالموعد:
– الحجز بتم من خلال مكتب ال (IDATA) عن طريق الاتصال على هاد الرقم (4448493) ,مع العلم أنو قبل بيوم لازم تروح على بنك أسمو (YapiKredi) وبتدفع 14 ليرة تركية بتخبرهن أنو بدك تدفعها للمقابلة بالسفارة الألمانية.

* ملاحظات:
-قبل ما تحكي وتحجز اعمول إيميل في حال ماعندك , وخليه جنبك لأن رح يطلبوه كرمال يبعتولك تأكيد الحجز والمعلومات وخلي جنبك جواز السفر.

-لما بتحكي مع المكتب مشان تحجز برد عليك مجيب آلي بالتركي اضغط انت الرقم 8 عالسريع بيطلعلك الموظف اللي بيحكي إنكليزي و حاول تحكي الصبح عال8:00 أو 9:00 ما بكون في ضغط عالخط.

-مشان الدفع روح على البنك اللي بتقسيم (elmadağ Şubesi) الموظفة اللي بتقعد عادة عاليمين بتحكي انكليزي إذا أنت ما بتعرف تحكي تركي.**حطيت صورة بتبينلك كيف تروح من ساحة تقسيم على البنك لأن في أكتر من شعبة لنفس البنك.

بالنسبة إلي حجزت ب 15\9 عطوني موعد ب 5\12 .

**معلومات صغيرة عني كرمال الناس اللي حالتها مشابهة:
مواليدي 91 – شهادتي الثانوية آخدها بال 2010 لأني عدت بكلوريا- طالب هندسة تحكم آلي بجامعة حلب- سنة تانية (مع العلم أنو ما كان معي ولا أي ورقة بتثبت هالشي بالمقابلة لأن ما قدرت أوصل للجامعة).
+التحضير للمقابلة و الأوراق:

أكتر حدا ساعدني على الإطلاق بالموضوع هوي أخي كونو طلع قبلي على ألمانيا, كنا نتواصل على طول لما عم نحضر الأوراق ويزودني بالمعلومات.

القبول: جامعة كلاوستال – بكالوريوس تكنلوجيا طاقة – قبول مشروط.

التمويل: حساب بنكي ب شباركسة .

اللغة: سجلت بمعهد غوتة باسطنبول دورات مكثّفة كلفتني الدورة 700 ليرة تركية بالشهر, بلشت ب 5\8 وخلصت ب 4\12 حصّلت(A2.1 ). المستوى التعليمي ممتاز لأن مدرّسنا كان تركي وكان يرفض دائما يحكي بغير الألماني لأن كنا سوريين وأتراك بالصف. اسم الأستاذ : سليمان تُرك. طبعاً شغلك بالبيت هوي الأساس..

-الأوراق: قبل ما أطلع من سوريا ترجمت (للإنكليزي) كل أوراقي وصدقتهن من الخارجية( بدون تصديق من سفارة بيروت).
وهنن نفس الأوراق اللي بيبعتلك ياهن المكتب ع إيميلك. (رح أشرح بعدين شو أخدت معي)

*ملاحظات :
– عنوان معهد غوتة( Yeni Çarşı Caddesi No:32 Beyoğlu, Turkey)

بتمشي بشارع الاستقلال لعند مدرسة(Galatasaray) بتنزل بالنزلة اللي ع يسار المدرسة(اللي فيها تمثال بواري الصوبة ) رقم البناء 32 مبين علم المعهد لونو أخضر ,عادة التسجيل بيبدأ كل 4 الشهر وبكون في زحمة ف حضّر حالك وانزل بكيرعال8:00 الصبح.

-مشان القبول وفتح الحساب تواصلت مع شب سوري بألمانيا بأمن قبول جامعي وبيفتحلك حساب.(قوانين المجموعة ما بتسمح أكتب اسماء !).

+قبل المقابلة:
-قبل شهر من المقابلة تماماً حطيت كل تركيزي عالمقابلة وصرت حضر أجوبة للأسئلة اللي ممكن أنسألها أو الأوراق اللي ممكن تنطلب بالإضافة لأني كتبت الـ( CV & Motivation letter ).

-استفسرت من كل الناس اللي بتعرف بالموضوع وصرت اقرأ المعلومات اللي بالمجموعة واكتب ملاحظات على دفتر جانبي.

-قبل المقابلة بجمعة كانت كل أوراقي جاهزة والمصاري بالبنك ومخلص رسالة الدافع والCV ومعبّى استمارة السفارة.

-قبل بيوم رحت على موقع السفارة مشان أعرف وينها لأن مقابلتي كانت 7:15 الصبح ف ماكان خرج ضيع وقت أبداً.

*ملاحظلات:
-لا تستهون بال CV و ال Motivation بياخدوا وقت وأهم شغلة اكتبهن أنت وخلي حدا صاحب خبرة يصلحلك ياهن.

-مشان نسخ الأوراق لا تنسخ بمكتبة غالية روح دور ع مكتبة رخيصة لأن عندك نسخ كتير أوراق بدال ما تدفع 80 أو 90 ليرة بتدفعلك شي 40 ليرة يعني بتوفر شي20 يورو .

+يوم المقابلة:

-الساعة 7 إلا عشرة كنت قدام باب الفيز ( مو الباب الكبير اللي عليه العلم!… الباب صاير بالشارع التاني بتمشي ع سور السفارة وبآخرتو عاليمين في نزلة بتنزل فيها*{حطيت كمان صورة وعلّمت الباب بنجمة حمرا}* هنيك مبين باب حديد وجوا في نقطة تفتيش قبل ما تدخل, ف ما تكتّر غراض وخود بس أوراقك والمصاري ).

-دخلونا سبعة ونص ,الموظفين اللي عالباب أتراك ومالهن خلاق يحكوا معك إذا ما بتعرف ألماني أو تركي وكاتبين هالشيء ع ورقة برا ف ماتخاف هي بس للدخول مو للمقابلة …. يفضّل تحكيهن ألماني مانها صعبة تدرّب عليها هيي جملة بعد ما تقلو صباح الخير ( ich habe einen termin ) و فرجيهن الورقة اللي بتثبت حجزك اللي بعتلك ياها المكتب ع إيميلك مع جواز السفر.

-دخلت بعد التفتيش بتقعد بغرفة عاليمين لحتى ينادولك أسمك لا تخاف إذا طولوا لينادولك… الموظفتين بيحكوا إنكليزي وكتير حبابين.
نادتلي أسمي دفعتلها عشرين ليرة بعد ما أخدت العنوان ورقم الهاتف ومعلومات عن الجواز. وعطتني ورقة متل وصل الدفع ومصنّف أحمر صغير نايلون(هاد بحطولك فيه الجواز بس تطلع الفيزا) بتقعد مرة تانية لحتى يطلع رقمك أو ينادولك.

-بس أجا دورك بتطلع من الغرفة اللي كنت فيها و مشان ما تتلبك باب الشبك اللي بوشك عاليسار روح عليه وخلي عينك عالموظف اللي فوتك أول شي مشان يفتحلك الباب من عندو… بتدخل من الباب ( عملياً بتطلع من القفص ههه ) بيجي عندك درج خفيف بوشك بعدين عاليمين في غرف مرقمة أنت بتروح عالرقم اللي بقلولك عنو.

-دخلت كان رقم الغرفة 4 الموظف سوري وكتير حباب عطيتو( المصنفات) وبلّش يسألني ويكتب كلشي بحكيه.
**(المصنّفات): 3 مصنّفات واحد للأوراق الأصلية وتنين للنسخ الأبيض والأسود, مرتبين متل بعض من فوق لتحت هنن :

( الاستمارة , الCV , صورة جواز السفر , القيد المدني , Motivation letter ,الشهادة الثانوية, القبول الجامعي , أوراق عن الجامعة والسكن و معهد اللغة , وصول التحويل أو كشف الحساب إن وجد , أوراق معهد غوتة , ورقة لقاح شلل الأطفال).

**سألني كتير أسألة ما بذكرها كلها بس كانت الأسئلة عن كلشي عملتو من لما أخدت شهادتي لحتى فتت عالمقابلة وعن الفترة الأولى بألمانيا و الفرع اللي بدي ادرسو وإذا رح ضل بألمانيا أو لأ.

وجاوبت عن الكل وما خربطت أو تلبكت وهوي كان مريح وكانت المقابلة برأيي جيدة ومريحة.
آخر شي قلي اعطيني صورة و 60 يورو.

*ملاحظات :

-خود زيادة عن ال60 يورو 20 ليرة تركية هي بتدفعها بغرفة الانتظار عند الموظفة كأجرة توصيل لأن بيبعتولك الجواز ع بيتك بالبريد.

-في شغلة لازم تعرفها- إذا مو داخل ع سفارة من قبل- أنو التعامل معك كلو من ورا البللور(الزجاج) وفي عالطاولة قدامك درج بتحط أوراقك فيه وبيسحبو الموظف لعندو حتى لما بتدخل عالباب الرئيسي نفس الشي وفي مكرفون ومكبر صوت بتتواصل من خلالهن ف ما تخلي هالشغلات تلبكك.

– ممكن يقلك الموظف بتاخد العملية بين 4-6 أسابيع مع ذلك بعد المقابلة تلفونك خليه جنبك على طول ممكن يدقولك قبل أو يطلبوا منك أوراق.

-دخّل معك يورو حصراً وخلّي الصور بيومترية المصور بيعرف هالحكي.

+صدور النتيجة:

– 29\12 دقلي موظف من السفارة الساعة 12:30 حكاني بالإنكليزي وقلي جيب تأمين صحي للسفر لمدة 3 شهور وجواز سفرك ووصل الدفع( اللي بيعطيك ياه الموظف بس تدفع ال60 يورو) وتعال بكرا عالسفارة.

-عملت التأمين الصحي اليوم 30\12 بمكتب جنب السفارة ( قوانين المجموعة ما بتسمحلي اكتب اسمو) ورحت ع السفارة نفس الباب اللي دخلت منو أول مرة( كمان حكيه ألماني أو تركي أو جيب مترجم) .

– دخلني فورا عالرقم 3 قلي الموظف وقع هي الورقة مكتوب فيها أنو لازم كل سنة أثبت أنو معي حساب بنكي فيه 8000 يورو, وقّعت بعدين أخد الجواز والتأمين وتأكد من العنوان ورقم الهاتف وقلي بنبعتلك ياه عالبيت. وهلا أنا ناطر بالبيت

**بس آخر ملاحظة مهمّة للشباب بتركيا اللي خالصة مدة زيارتهن.. كتير كنت نزّل سؤال هون عالمجموعة ومحد يجاوب وينحذف بوستي اللي هوي بخصوص الإقامة,بس آخر شي عرفت , داخل السفارة ما إلهن علاقة إذا معك ‫

#‏إقامة‬ أو لاء. موضوع أنو مامعي إقامة أثّر عليي بسعر التأمين الصحي لا أكثر ولا أقل إضافة لل 320 دولار اللي بدي أدفعها بالمطار كضريبة بس اطلع برا تركيا.
عقبال الكل وبتمنى تكونوا استفدتوا… موفقين يا رب .

تعديل 1 بتاريخ : 30\12\2014

لحتى تدفع بالبنك عند الحجز و تعمل الضم

ان الصحي بس يجي القبول المفروض يكون عندك رقم ضريبي بينعمل بالمبنى اللي جنب الأمنيات ب أكسراي اسمو Tax numara…

بعد ما بتحط الجواز بالسفارة الشركة اللي بتوصلو عالبيت أسمها UPS فيك من خلال موقع الشركة ups.com.tr تدخل وتتعقّب تحركات الجواز
من الورقة اللي بيعطوك ياها بالسفارة بغرفة الانتظار اللي مرسوم عليها( شحنة ) بتاخد شيء اسمو Takip No وبتدخلو بالحقل اللي بيحمل نفس الاسم

…. بتدخل رقم جوازك وتاريخ المقابلة … وبتختار جواز سفر وبيكتبلك بالتفصيل وين جوازك وأي ساعة تم التسليم من السفارة للشركة ومين شيّك عليه …. بعتولي الجواز عالبيت ب 3\1 وعليه الفيزا الشنغن …. عقبال الكل. موفقين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close