العيوب والصعوبات في الحياة في أمريكا

 

دي هتكون بدايه سلسله هعملها بعنوان ( ما لا تعرفه عن بلاد المهجر ) للحديث عن العيوب او المعني الادق التحديات ال هتواجهك لما تسافر

طبعا مش محتاج اتكلم عن مميزات بلاد المهجر لان لو جبت عيل في حضانه عندة 3 سنين هيقولك علي المميزات .. معتقدش ان في بني ادم علي الكوكب مش عارف مميزات العيشه في بلاد المهجر .. اقل اقل اقل اقل حاجه لو متعرفش اي مميزات كفايه الجنسيه ال تدخلك نص كوكب الارض بدون اي قيود في السفر

وحتي الناس ال بتتكلم عن العيوب يقعد يرغي بقي في نظريات فلسفيه عن الغربه والاهل والاجتماعيات والتاقلم والجيل التاني والتالت من المهاجرين .. والهويه العربيه والبتنجانيه والهري دة كله .. لكن انا بقي هبعد عن كل السفسطه الفارغه دي وهقولك التحديات الواقعيه واقدملك حلول مُتاحه ليها كمان
.

هنتكلم النهاردة عن امريكا .. اي هي العيوب او الصعوبات ال هتواجهك في امريكا ؟

1- السكن في امريكا : ايجار البيت او الشقه ال بتقعد فيها بياخد نص المرتب بتاعك وفي بعض الولايات زي كاليفورنيا بياكل 75% من المرتب

فبتلاقي انك كل شهر عمال ترمي فلوسك في الارض في حاجه مش ملكك .. ولو حاولت تحل مشكله الايجار وتقول اشتري بيت ملك هتتصدم ان اقل بيت ثمنه علي الأقل ربع مليون دولار كاش

فبتضطر تروح تعمل حاجه من اتنين :

يا تاخد قرض من البنك بفائدة محترمة و تسدد في قسط البيت لمدة علي الأقل من ٢٠_٣٠ سنة
و لو تعثرت بيتحجز علي البيت وبتبقي في الشارع .. يعني بتبقي مضغوط انك لازم تسدد بانتظام

يا تقدم علي السكشن 8 لو دخلك قليل ( او يكون دخلك كويس اصلا وبتشتغل كاش بس بتبقي في نظر الحكومه دخلك قليل وتقدم عليها )

سيكشن 8 برنامج فيدرالي لمساعدة المستأجر محدود الدخل.. تقريبا المستأجر بيدفع ثلث الايجار والدولة تدفع الباقي… بيتعمل لك تقييم حسب دخلك والضرائب وعدد افراد الاسرة الخ.. عيوبه انه مش فوري.. يعني مش أول ما تقدم تحصل عليه.. بعض المدن فيها قوائم انتظار 6 شهور وبعضها سنوات زي دالاس في تكساس

التمليك فيه برنامج FHA وهو فيدرالي برضه لمساعدة المشترين خاصة المشترين لأول مرة اللي مش معاهم كاش يكفي سداد الجزء النقدي أو الكريديت اسكور قليل.. او الحالتين مع بعض.. بتدفع 3.5٪ بدل 10 وتلاسكور المطلوب 580 بدل 750+ وبرضه بيتعمل تقييم بس ده اسرع لإنه بمجرد الموافقة على طلبك بيقوم البرنامج بضمان قرضك لشراء البيت من البنوك بس خلي بالك لو اختارت بيت غالي هتتنقل من ال FHA ل conventional loan

طيب البيت بقي ملكك بعد 20 سنه الحمد لله هل كدة كل المشاكل اتحلت ؟ للاسف لأ لان فيه ضرايب اجباريه علي البيت الملك وتصليحات اجباريه له .. ومصاريف رعايه ليه بس طبعا علي الاقل هيكون ليك بيت ملك احسن من الايجار ..
.—————————————————–

2- مصاريف الجامعات : للاسف مصاريف الجامعات هنا غاليين جدا بتوصل من 20 الف دولار ل 100 الف دولار سنويا لبعض التخصصات
فالمهاجر ال عندة ولاد داخلين علي جامعات ميلاقيش حل غير حاجه من اتنين

* يا يدخل عياله كوميونتي كوليدج سنه او اتنين ياخد دبلومه او اسوشييت دجرري ويشتغل بيها علي طول ويفكس من التعليم كله اساسا

* يا يدخل عياله الجامعه عن طريق انهم ياخدوا قرض من البنك ويفضل دين في رقبته طول العمر مربوط في ساقيه عشان يسدد فيه بعد ما يشتغل والا يتحبس
.—————————————————-

3- التيكتس : اكثر حاجه بيلبس فيها المهاجر الجديد ودة نتيجه انه جاي بلد غريبه اول مرة يسوق فيها وبياخد فتره علي ما يتعود علي النظام .. هديك شويه امثله

مثلا واحد متعود يشغل ال gps وهو سايق فبيلعب في الموبايل وهو سايق عشان يظبط اللوكيشن فهياخد تيكت لانه المفروض يقف قبل ما يمسك الموبايل اصلا

مثلا واحد بيسوق بالراحه وعلي مهله في الحاره الشمال .. مينفعش يعمل كدة في الحاره السريعه لانه هياخد تيكت والعكس صحيح مثلا سرعه السواقه في الشارع الفلاني متزيدش عن 60 .. مينفعش انت تسوق فيه علي 65 مثلا .. فهتاخد تيكت

وغيرها من ملايين الامثله اللي هتاخد وقت علي ما تتعود عليها فأول 6 شهور ليك في امريكا .. ممكن شقا اسبوع شغل يتدفع قدام عينك سواء في تيكت باركينج او تيكت تعديه طريق الخ الخ .. ويكون السبب ضابط معقد ولا غلطه بسيطه

المشكله مش في الفلوس بس .. لان المخالفات هنا مش زى مصر
لا المخالفة بعدد معين من النقط فى مخالفة تاخد فيها نقطين او 4 او 12 ودة بيكون الحد الاقصى لو وصلت للعدد دة ساعتها بقى حسب قرار القاضى ممكن تتمنع من القيادة لمدة 6 شهور او سنة او اتنين انت ونصيبك بقى

مخالفة المرور هنا مش بتخلص انك تدفع الغرامة لا اطلاقا لازم محامى وتروح المحكمة والقاضى يدى حكمه بقى و انت ونصيبك

كمان في حتت صايعه مش هتتعلمها الا لما يمر عليك وقت في امريكا .. زي مثلا انك متدفعش التيكت في المحكمه وتدفعها اونلاين عشان لو روحت المحكمه هتدفع التيكت + مصاريف المحكمه اللي بتكون غالبا ضعف ثمن التيكت

ولو مش عايز النقط تتخصم منك بتروح المحكمة واشرح للقاضي الموقف وقوله هاخد seafty class
هتروح ٤ أو ٨ ساعات محاضره اللي هيقررها القاضي وبعد كده تاخد الشهاده توديها المحكمة ومش هيبقي عليك حاجه في الريكورد بتاعك
.————————————————–
4- مشكله ال Local Reference عشان تلاقي شغل :

اي مؤسسه عمل في امريكا بيكونوا عاوزين reference من جوة امريكا ، يعني شركه مثلا اشتغلت فيها جوة امريكا يقدروا يرجعولها عشان يعرفوا انت كنت عامل معاهم ايه .. ده اللي يهمهم ، مش بيدوروا فقط علي واحد عندة خبرة جوة امريكا ،،

يعني من الاخر بيدوروا علي Local Reference مش Local Experience

هتقولي وايه الفرق بين الاثنين ؟؟؟ لااااااااا تفرق كثير اوي ،، لان ممكن انت يكون عندك CV بيل جيتس وخبره 500 سنه جوة امريكا بس تكون مطلع عين اهل المديرين بتوعك وبتضربهم بالشبشب .. ممكن يكون معاك CV مجدي يعقوب ومعاك خبره 500 مليار شهر في مهنتك جوة امريكا بس تكون حرامي ومتحرش .. فالموضوع مش Local Experience قد ماهو Local Reference عنك وعن شغلك وعن طريقتك في الشغل جوة امريكا في الاماكن ال اشتغلت فيها قبل كدة في امريكا

عشان ابسطهالك زي بالضبط موضوع الايجار في امريكا ،، اول مرة مش بيرضي حد يأجرلك لو اوفيس او شركة ماسكة بيوت ،، لكن لما بتاجر مثلا عند ناس او تقعد مع حد وتكتب اسمك علي الليز ،،، بتبقي مصدر ثقه و بعد مدة خلاص بيكون في هيستوري لك في موضوع الايجار وانك ماشي كويس بدون مشاكل وتعرف بعدها تاجر لوحدك في اي مكان ..

حل الموضوع دة
بال volunteering .. انك تعرض نفسك علي اصحاب الشغل انك تشتغل ببلاش لمدة سنه مثلا .. اي صاحب عمل ف الدنيا نفسو ومني عينو انه ميدفعش ضرائب ولا تأمينات علي الموظفين وياخد شغل اكثر من الموظف عشان يكسب اكثر .. انت بقي بتوفر لصاحب العمل كل مواصفات موظف الاحلام اللي بيتمناها .. مش هيدفعلك ولا مليم مقابل انك هتشتغل Full Time كمتطوع وهو مش هيبقي عليه اي مسؤليه قانونيه .. هتقولي وانا هستفيد من الهري دة كله بأيه ؟؟ باختصار بتاخد التطوع مجرد كوبري عشان تثبت نفسك وتعمل علاقات و تاخد خبره و Reference منهم .. إطحن نفسك في الشغل كام شهر واثبت نفسك كمتطوع و بعدين قولهم جايلك Job Offer من مكان تاني هتلاقي الشركه نفسها بتتمسك بيك و تعمل المستحيل عشان تفضل معاهم .. كله بيعتمد علي شطارتك

بس طبعا عشان يقبلك ك volunteer دونا عن باقي المتقدمين لازم يكون عندك خبره كويسه في مجالك من البلد ال انت جاي منها وكمان بتتكلم انجلش كويس اوي خصوصا لو مهنه dealing directly with customers

————————————————-
5- الكريديت سكور :

الكريدت سكور هو تاريخك المالى اللي بيترتب علية هل البنوك تثق فيك ولا لا سواء عاوز تاجر تشتري عربية أو بيت يعني من الاخر من غيرة انسي انك تعرف تشتري و تبيع .. لما اسكور بتاعك بيكون كويس تقدر تشترى عربيه باحسن سعر و بدون down payment و اقل فوائد و نفس الحال لشراء المنزل أقل تقديمه اقل فوائد حسب مده الكريدت هيستورى و حالته مقبول اوممتاز

لكن للاسف المهاجر الجديد بيكون اول مرة ف حياته يتعامل ان كل حاجه في حياته تبقي عن طريق البنك

لاننا متعودين علي فكره الكاش ف بلادنا العربيه .. فنتيجه لكدة تلاقي المهاجر ف اول سنه عمال يبوظ في الكريديت بتاعه .. لانه بيبقي محتاج يشتري حاجات كثيرة اوي اول لما يوصل علي ما يتعود
واقل رحله تسوق بتعدي 100 دولار .. فتلاقيه بيحمل ع الكريديت بتاعه وبعد سنه ممكن يلاقي نفسه مديون او هومليس ف الشارع

فأنصح اي حد انه قبل ما يهاجر امريكا انه يروح اي بنك او اي محامي هجره ويخليه يشرحله بالتفصيل الممل موضوع الكريديت وازاي ترشد استخدامه خصوصا ف اول 6 شهور ليك في امريكا لان مهما كان الوقت ال هتضيعه في فهم الموضوع وانت في مصر مش هيتقارن بالوقت والجهد والفلوس ال هتضيعهم وانت في امريكا
.
——————————————————————–
يارب اكون قدرت افيدكم ولو بجزء بسيط من المعلومات ال عندي

البوست الجاي عن عيوب كندا باذن الله

مع تحيات محاميحو للسفر الداخلي والخارجي وبلطيم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.