ما هو الايلتس ؟ ما هو امتحان الايلتس؟ ما هي اسئلة الايلتس؟

امتحان الايلتس هو امتحان لقياس مدى معرفتك بالانجليزى و بيقيس معرفتك دى باستخدام اربع مهارات رئيسيه

Reading – Listening – Writing – Speaking

الجهات المسئوليه عن تنظيم الامتحان ده هم

IDP

British Council

بتحجز معاهم اون لاين و بتدفع اونلاين او فى المكتب بتاعهم و بتمتحن فى اقرب مكان ليك هم بينظموا الامتحان فيه يعنى البريتش كاونسل فى العجوزة مثلا بس ممكن تمتحن فى محافظه تانيه

الامتحان فيه منه نوعين

General Training و ده للهجره

Academic و ده غالبا بيكون للدراسه و استراليا بتقبل بي فى الهجره لكن كندا لا كندا بتقبل جينرال بس

الفرق بين الامتحانين فى جزء ال reading و ال writing

الامتحان فى كل سكشن من ٩

و النتيجه الإجمالية بيجمع كل الأقسام الاربعه مع بعض و يقسم على ٤

معظم الجامعات بيهمها المجموع الاجمالي او overall و معظم الجامعات بتطلب 6.5 من 9 او اكتر و غالبا بتطلب اكاديميك

الهجره بيهتموا اكتر بنتيجه كل سكشن مش بال overall

يعنى ٦٦٦٦ هى الحد الأدنى للقبول فى الهجره

استراليا ٦٦٦٦ تنفع تقدم بيها لكن مش هتاخد نقط على اللغه ، ٧٧٧٧ تاخد ١٠ نقط على اللغه و ٨٨٨٨ تاخد ٢٠ نقطه على اللغه

كندا علشان يكون ليك فرصه لازم تجيب ٨٧٧٧ و ال ٨ دى فى listening

دى خطتى و background عن معرفتى بالانجليزى

مذاكره الايلتس عموما بتحتاج ٣ حاجات

١- جرامر و كلمات

٢- التدريب على المهارات الأساسيه زى ال reading و listening و ال Speaking

٣- التدريب على اسئله الامتحان و حل امتحانات كتب كامبريدج

طيب مبدأيا كده انا مستوايا فى الانجليزي متوسط و كنت باخد كورسات لغه فى معهد القوات المسلحه اللى ف كوبرى القبه و دخلت امتحان تحديد مستوى مع معهد الاميديست اللى فى الدقى و دخلت على طول كورس تحضير التويفل (صدقونى ملوش لازمه لو معاك الماتيريال المناسبه و عارف شكل الامتحان) و بعدين دخلت امتحان TOFEL iBT فى 2012 و جبت سكور overall : 84 of 120 ( الكلام ده من خمس سنين و بعدها اخر تعاملى فى الانجليزي انى بسمع اغانى اجنبي و بحب اسمع جون أوليفر و شغلى فى السعوديه بتكلم انجليزى معظم كلامى مصطلحات خاصه بالهندسة الكهربيه و الكهربا مش أكتر )

بالنسبه للايلتس ( General Training ) دى كانت اول مره بالنسبه ليا فبالتالي عرفت من اللى امتحنوا الايلتس قبل كده ان لازم أراجع على grammar و لابد يكون عندى حصيله كلمات كويسه بالاضافة الى تنميه المهارات الأساسيه اللى هى listening/ speaking / reading و طبعا ال writing كان عايزه مذاكره شويه مع طبعا الجرامر و الكلمات

بدأت أراجع ال grammar من الموقع ده:

https://www.learnamericanenglishonline.com

طبعا الموقع ده فيه ميزه ان كل قاعده جرامر او درس بيبقى فيه امثله بالاضافة الى فيديوهات و مقاطع صوتيه للمدرس Paul و ده ساعدنى انى أتدرب على listening فى نفس الوقت. الموقع ده انا اخدت فيه وقت كبير لانى مكنتش بذاكر كتير و بعدين الموقع فيه بعض القواعد اللى مش مستخدمه كتير ف نصيحه ذاكر القواعد العامه المعروفة و الامثله عليها و اللى تحس انه مش مهم عديه يعنى مثلا الموقع ده عليه أزمنه كتير احنا مثلا بنستخدم منهم المعروف اى المشهور منهم مثلا هو مزوّد عن كده فياريت اللى هيذاكر ما ياخدش وقت كتير فى الموقع ده و كل درس و كل مستوى عليه اسئله و تمارين يا ريت تحلوها هتفرق معاكم ان شاء الله

نقطه مهمه جدا : ✅✅ الموقع ده فيه جزء مهم جدا جدا و هو ازاى تكون جمله و الفرق بين sentences و clauses و انواع الجمل و استخدام ال connectors و الجزء ده مهم جدا جدا علشان هتحتاجوه فى writing قدام ما تفوتوش الجزء ده بالله عليكم

( طبعا انا كاتب اللى انا ذاكرت منه، مش شرط تستخدم نفس الموقع ممكن تستخدم خطه مايكل يوسف للمبتدئين و المستوى المتوسط)

كنت كل يوم الصبح اقرأ مقالين تلاته من موقع

‏http://www.bbc.com/news

و بقرا فى أكتر من مجال و اطلع الكلمات الصعبه و اعمل القاموس الخاص بيا و كمان كميه القراءه دى هتعودك على سرعه القراءه و الفهم بسرعه و مهم جدا تطلع ال synonyms الخاصه بكل كلمه هتفيدك جدا بعد كده فى المواضيع لان السؤال فى الريدينج بيجى بكلمه غير الاى فى القطعه ف لازم تعرف الكلمتين مش اكتفى بمعنى واحده و السلام

نصيحه خلى القراءه بفهم يعنى تكون بتفهم اللى بتقراه مش قراءه و كلمات و خلاص ده هيدربك كويس انك لو حبيت تقرا القطعه كلها فى الامتحان هتلاقى وقت انك تقرا بسرعه و تطلع معلومات منها كمان

قريت كمان القصه اللى نزلها مايكل يوسف فى خطته اسمها prime suspect قصه قصيره و سهله و مفيهاش كلمات كتير لو عايزين تبدأوا بحاجه سهله

Vocabulary:

طبعا بجانب الكلمات اللى كنت بطلعها من القراءه ذاكرت الملف ده IELTS Vocabulary- Learn 300 Essential Words for IELTS

طبعا ده من خطه مايكل يوسف هو كورس عباره عن فيديوهات لمحاضرات كل محاضره بيناقش ٧ كلمات و ده طبعا كان بيخلينى أتمرن على listening أكتر و غير كده كان بيديك synonyms لكل كلمه ( أكتر من كلمه مشابهه فى المعنى )

طبعا الكورس ده مهم جدا للى هيمتحن اكاديميك و خصوصا فى الجزء الخاص ب economic مثلا فى مصطلحات هتفيدهم جدا فى حل writing academic task 1

بجانب الكتاب ده

Collins vocabulary for IELTS book

طبعا انا حاطط لينك كتب كولينز فى جزء ال listening تحت

ميزه الكتاب ده انه جايبلك الكلمات و الأفعال و الصفات الخاصه بكل مجال زى الصحه و التعليم و المغامرة و المدن و هكذا زائد ام فيه تمرين على الكلمات و معاه audio exercise كمان يدرب ال listening عندك

(ملحوظه : هتلاقوا فى مذاكره الايلتس المهارات بتتداخل مع بعض يعنى هتلاقى تدريب الليسينينج داخل فى أكتر من مكان )

Listening:

بجانب المصادر اللى فوق كان عندى أكتر من مصدر للتدريب على السمع

1- BBC Learning English Application ( 6 Minutes English )

و ده عباره عن برنامج بيجى على BBC Radio هم واخدين كل المقاطع الصوتيه البرنامج ده و حاطينها فى تطبيق واحد بحيث تسمع المقطع و تشوف script مكتوب للكلام اللى بتسمعه و بالتالي تعرف النطق الصحيح للكلمات و كمان بتعرف كلمات جديده و هتلاقوا صوره منها فى البوست تحت

2- Collins listening CD1 & CD2

طبعا انا ما ذاكرتش من كولينز بس اخدت الملفات الصوتيه اللى على الاسطوانتين و هم حوالى 80 مقطع صوتى و نزلتهم على الموبايل عندى و كنت بسمعهم باستمرار على الطريق او و انا فى الجيم مثلا تقريبا سمعتهم حوالى ٣ مرات ورا بعض كل ما يُخلصوا اعيدهم تانى و الميزه فى المقاطع الصوتيه دى انها قريبه جدا من المقاطع اللى بتيجى فى الامتحان سواء المحادثات او المكالمات التليفونيه او المحاضرات و بالتالي اتعودت على اللهجه و عرفت المواضيع اللى بتيجى فى جزء listening

طبعا دى كله سلسله كولينز بس انا استخدمت جزء listening بس و جزء vocabulary زى ما قولت فوق

‏https://drive.google.com/open?id=0B5r4XBS4elOLUVdoMHJBOVZ0d2s

3- songs, movies, series, sarcastic shows ( John Oliver (British) – Trevor Noah ( African American) – John Stewart ( American )

كل ده لحد شهر قبل الامتحان و ساعتها قررت انى ابدا احل امتحانات الايلتس علشان اعرف مستوايا و بحل غلط او صح

بدأت حليت ٤ امتحانات academic reading ( على العلم انى همتحن جينيرال بس حبيت أتدرب على أكتر من قطعه صعبه علشان بعد كده فى الجينيرال الموضوع اسهل ف حليت ١٢ قطعه من كتاب Cambridge 6 من غير ما أحط لنفسي وقت معين و فى نفس الوقت كنت بطلع اى كلمات جديده

بعد كده بدأت احل امتحانات general training بس المره دى بوقت محدد اللى هو ٦٠ دقيقه لكل امتحان حليت دول 👇👇

Cambridge IELTS General Training 11 – reading tests 1/2/3/4

عباره عن اربع امتحانات كاملين جينيرال حليت منهم اربع امتحانات reading (طبعا كان لسه Cambridge general training 12 مكانش لسه نزل و الا كنت حليته)

بقيه امتحانات كامبريدج كانت كلها academic بس فى اخر كل كتاب فى امتحانين general A& B حليت امتحانات الجينيرال اللى موجوده فى كتب Cambridge 8,9,10 و كنت دايما بحسب السكور بتاعى كان بيتراوح ما بين 5.5 آلى 7.5 حسب صعوبه كل امتحان

بعد كده حليت امتحانات listening فى يومين حليت ١٢ امتحان من Cambridge 9/10/11 و طبعا كنت بشغل التسجيل متواصل علشان احل فى نفس وقت الامتحان و كنت دايما بحسب السكور بتاعى كان بيتراوح ما بين 6.5 الى 8.5

طيب بعد كده بدأت اذاكر فى writing اتفرجت على فيديوهات Liz و كانت مفيده جدا

‏Task 1 general

ذاكرت من الكتاب ده

Task 1 IELTS Writing (general training module by Adam Smith)

و بعدين بصيت على sample letters من الموقع ده

IELTS writing task 1 – letter samples Band 8

‏http://www.ielts-blog.com/ielts-writing-samples/ielts-letters-band-8/ielts-sample-letters-of-band-8/

مفيده جدا و نفعتنى فى writing task1 general

و للأسف ضيعت وقت فى مذاكره Ryan Higgins و ندمت بعد كده لانه كتابه صعب و لخبطنى محدش يذاكر الكتاب ده

Xx IELTS academic and general Task 2 how to write at band 9 level xX ⛔️⛔️⛔️⛔️❌❌❌

محدش يذاكر الكتاب ده مضيعه وقت على الفاضى 👆👆👆

رجعت لخطه مايكل يوسف و اتفرجت فيديوهات الكورسات دى

‏IELTS7 Writing Task 1

‏IELTS Writing Task 2- Achieve Band 7+ in 5 Hours

طبعا الكورس بتاع task2 ده فادنى جدا و لو كنت بدأت بيه كنت ممكن اجيب 7 فى الرايتنج او أكتر بس طبعا عرفت متاخر و طلع كورس مهم جدا و منظم جدا و بنصح اى حد فى task 2 يتفرج على الفيديوهات و يعرف ليه الناس بتنقص فى الرايتنج و لو عايز تجيب فى الرايتنج درجه معينه لازم تعرف انت مطلوب منك المقال يبقى عامل ازاى 👍👍👍👍👍👍

بعد كده كتبت حوالى 6 essays و 5 letters كتدريب قبل الامتحان ب ٤ ايام و لازم تقيم المقالات بتاعتك علشان تعرف انت بتكتب صح و لا لا طبعا في أكتر من موقع بيعمل تصحيح لل essays بفلوس طبعا بس مبلغ مش كبير و هو بيكون تقييم زى ما examiner هيقيم بالظبط و هيديك ملاحظات كمان و اول ما هلاقى اللينك بتاع الموقع ده هضيفه على البوست ان شاء الله

نصيحه : اكتبوا المقالات على نفس ورقه الحل اللى بتستلمها فى الامتحان لأنك بكده بتعرف انت ٢٥٠ كلمه بياخدوا منك كام سطر علشان فى الامتحان ما تعدش كلمه كلمه و تعرف من عدد السطور انت كاتب كام كلمه تقريبا و ال samples دى موجوده على النت سهل تلاقوها

بالنسبه لل speaking بحكم شغلى فى السعوديه الأربع سنين اللى فاتو انا بتكلم يوميا مع جنسيات مختلفه بس طبعا معظمها بتبقى مصطلحات خاصه بالشغل بس رهبه الكلام نفسها قدرت أتغلب عليها بالممارسة و للأسف مكانش عندى وقت أتدرب مع نفسي و أسجل لنفسي وأصحح أخطائي و الكلام ده فعملت الآتى

اتفرجت على الفيديوهات اللى فى الكورس ده من خطه مايكل يوسف

‏Get 7-9 in IELTS Speaking

اساس ال speaking يكون عندك حصيله كلمات مش قليله و معرفه كويسه فى الجرامر و استخدام جمل بسيطه و معقده و idioms

و بعدين اتدربت مرتين كل يوم ساعتين مع مهندس فليبينى صاحبي كان هو speaking partner و كنا بنقعد فى نفس جو الامتحان و الاسئله بس كان بيصححلى لو كان فى غلط فى الجرامر او نطق كلمه معينه – طبعا اللى ساعدنى فى الامتحان speaking و خلانى اجيب ٦ من اول مره و ما اقلش عنها استخدامى لكلمات less common و كلمات صعبه زى political and economical corruption او historian لان كان امتحانى عن حدث تاريخي و انا اتكلمت عن ثوره ٢٥ يناير

اليومين اللى قبل الامتحان اتفرجت على فيديوهات EMMAعلى اليوتيوب اللى بتنصح فيها ازاى تحل كل جزء و ايه الحاجات اللى مفروض ما تعملهاش فى الامتحان فيديوهات قيمه جدا و بتقولك على tricks فى كل جزء

طبعا انا بذاكر الكلام ده من شهر مارس تقريبا بس طبعا ما كنتش منتظم فى المذاكره و ما ذاكرتش حاجه فى رمضان يعتبر و زنقت نفسي فى اخر ٣ أسابيع بجد و كنت بذاكر ٥ ساعات فى اليوم و لو كنت ذاكرت بنفس التركيز ده لمده شهرين كنت ممكن اجيب ٧ فى ال writing و ال speaking من اول محاوله بس قدر الله و ما شاء فعل انا امتحنت يوم ١٩-٨-٢٠١٧ و النتيجه طلعت بعد أسبوعين

نصائح اخيره :

‏Reading

حاولوا تتعودوا على كل انواع الاسئله سواء true/false/not given او fill in the gaps او match the paragraph headings – حاولوا تخلوا كل سكشن ليه ٢٠ دقيقه او اقل انا كنت منظم وقتى و لقيت ٥ دقايق كمان راجعت فيهم تانى

Listening

يعتبر اسهل جزء فى الامتحان تقدروا تجيبوا فيه درجات كويسه و اهم جزء فى الامتحان حاولوا تكونوا هاديين و انتوا بتحلوه لانه بياثر بعد كده على بقيه الأجزاء سواء بالسلب اى الإيجاب

Speaking

الهدوء و الثقه – الممتحن ملوش مصلحه انه يديك درجه قليله – ال less common vocabulary مهمه جدا و بتعلى السكور – اللكنه معلهاش درجات و لا بتنقصوا عليها يعنى ما تعوجش لسانك بريتش او امريكانى حاول تتكلم على طبيعتك علشان ما تلخبطش نفسك

Writing

Task1

عليه تلت الدرجه و طبعا اقل اهميه من task2 بس مهم و ممكن لو جبتوا فيه درجه عاليه ترفع الدرجه الكليه بتاعت الكتابه نركز على المقال و كل حاجه بس الجزء ده مهم برضه

هنا هتلاقوا لينك خطه مايكل يوسف للايلتس و اللى منها تقدر تنزل كل الماتريال اللى انا اتكلمت عنها فوق

https://m.mediafire.com/folder/9o7paff3rfba3/IELTSStudyPlan2017

Password: michaelyoussef

لينك تصحيح الرايتنج

http://www.ielts-blog.com/check-your-ielts-writing/ لينك موقع ليز للايلتس http://ieltsliz.com

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.