الهدف من هذا الموضوع هو توعية الشباب المقدم على عمليات الانتحار الجماعي وخصوصا بعد ان اصبح الاتجار بالبشر هو الاسم الحقيقي لعملية الهجرة الغير شرعية الى اوربا .
{وَذَكِّرْ فَإِنَّ الذِّكْرَى تَنْفَعُ المُؤْمِنِينَ} [سورة الذاريات: 55]
حساب تحت مسمى چاي وچذب @ahmednadhim56 يروي لنا قصته الكاملة للهجرة باللهجة العراقية ، قمت بوضع كلمات باللغة العربية الفصحى بين قوسين ليصل المعنى .
ـــــــ
قبل لا اطلع من بغداد اتفقت وية واحد يطلعني ع البحر من تركيا لليونان اذا چوب نفخ (قارب مطاطي ) ب١٠ ورقات (1000$) واذا يخت سياحي ب ٢٠ ورقة(2000$)
اني اتفقت على اليخت لان بالچوب احتمال يعطل المحرك بنص البحر احتمال تغرگ احتمال ينشگ الچوب اكو ولد طلع ٨ مرات بالچوب وما وصل لليونان
واكو ٣ مرات وما وصلوا واكو من اول مرة يوصلون شغلة حظ يعني حسب كلامهم اليخت تعتبر رحلة سياحية بالنسبة للچوب النفخ وخطورتة
طرت من بغداد بقيت بإسطنبول ٣ ايام طلعت لمنطقة ١٢ ساعة بالباص اسمهة مرمريز هم بقيت بيهة ٣ ايام ننتظر اليخت شوكت يجي
اجانة خبر ساعة ٨ المغرب انه نتحظر راح نطلع فكل واحد اخذ وياه نساتل وكيك و٣ بطالة مي للطريق صارت ساعة ١٢ طبگت سيارة بوكس بفرع
احنة ٩ ركض صعدنا بالبوكس المغلق وبقة يفتر ويصعد ناس لحد ما صارت ناس فوگ ناس كتل وزواع وماكو نفس وحتى مجال توگف ماكو عراقيين سورين افغان
بقة يفتر بينة ٣ ساعات لحد ما وصلنة لل”نقطة” نزلنة عبالنة نلگة اليخت لگينة جبل كلش عالي گبالنا گالونا يالله اصعدوا الجبل وچانت ظلمة كلش
والجبل كلة صخور متحركة يعني اذا متدير بال احتمال تنلوي رجلك او توگع تنكسر واذا ما تركض المهربچي يشبعك كفخات(ضرب على القفى) ٤٥ دقيقة صعدنا بگطعان النفس
النزلة اصعب ويانة نساء كبار وجهال بس كلمن يگول يا روحي اجو يلزمونة (ارادو يمسكون بنا) خفر السواحل التركي لان يدرون هاي نقطة عبور بس ختلنا (اختبئنا)وخلصنا منهم
وصلنا للساحل بعد ساعة ونص ع الجبل صعدنة باليخت حوالي ٥٠ واحد غرف صغيرة جوة وفوگ بنات روسيات بالبكيني عود يخت سياحي مو تهريب
الرحلة ٦ ساعات اني نص ساعة وما تحملت زوعت(تقيئت) وتخربطت ونمت ٥ ساعات ونص گعدوني گلولي انزل وصلنة ههههههه
نزلونة ع جزيرة اسمهة كالتي ساعة ١٢ الظهر خابرنة خفر السواحل وبقينة ننتظر للساعة ٤ ومحد اجانة ومحد جايب مي بس مجموعتنة والمي خلص
قررنا نصعد الجبال للطرف الثاني مال جزيرة لان شفنة اكو قرية عال جي بي اس بس جبال كلش عالية وما عدنة مي وهواي عوائل ويانة
احنة تسلقنا بقوا العائلة الافغانية لان مرتة حامل وخلال ساعة بدة العطش وصار ألمي أغلى من الذهب شفنة مي مال راعي غنم مال طليان شربنة منة هههه
ورة ساعة ونص من التسلق اجونة الشرطة اليونانية جايبين وياهم مي ومن سمعوا اكو اطفال جوة ومرية حامل تخبلوا نزلوا عليهم ركض
همة بأيدهم صعدوا الأطفال وحسبونة وسإلونة شلون اجينة گلنالهم ما نعرف دنية ظلمة جانت وكلشي مشفنة
بقينة نتسلق وياهم بس مو مهم لان جابولنة مي لحد ساعة ٧ وصلنا لكنيسة بقينة بيهة ساعة زمان وصعدنة بسيارات ودونة لمدرسة بالمدينة
جابولنة فراش وأهل المدينة الصغيرة من كل بيت جابوا اكل وسوولنة عشا ووكلونة طبعا بدون منية وكلش متقهقرين علينة
واحد ابو بطن ويانة گال مشتهي ببسي ولد شاب يوناني راح جابلنة ببسي على حسابة واجة
انطونة الخارطيات وطلعنة بسفينة لجزيرة اسمهة رودس لازم ننتظر بيهة لثاني يوم تجي عبارة ١٢ ساعة بالبحر لاثينا
نمنة بالحديقة بالشارع گمنة نتغطى بالكراتين من البرد والصبح رحنة جبنة ريوگ وشفنة فرن صمون اني و٣ ولد اشتريت منة صمون وگعدوا ناكل ع الرصيف
طلع ابو الفرن شافنة كالكلاب السائبة ظل يدگ على راسة ويلطم ودمعت عينة گال انتظروني ثواني دخل جابلنة جبن وكومة صمون ونص الفرن انطانياه ههههه
صعدنة بالعبارة النفر ٦٥€ احنة اللاجئين الصعدنة ٥٠ واحد بس ورة ٣ ساعات وصلنة لجزيرة كويس وشفنة ظيم وظلايم
٥٠٠٠ الاف عراقي وسوري منتظرين العبارة صارلهم اسبوع نايمين بالشارع ومحد يقبل يفوتهم للحمام يعني اذا تريد تروح للتواليت تفوت للبحر وتعملهة ههه
صعدوا نص والعبارة قبطت وبقوا نص طبعا الريحة مال عفونة والوصخ صار بفلس حتى بوگ(سرقة) صار موبايلات محافظات نعالات كلشي ينباگ
ورة ساعتين من كويس وحدة حامل صار عدهة ولادة هههه فر الباخرة ورجع نزلناهة وطلعنا اخرتنا ٣ ساعات
وصلنا لاثنا طبعا اذا احلفلكم بغداد احلى من اثنا بمليون تالاف مرة مدينة كلش قذرة اول مرة اشوف مدينة كلهة ريحة …..
نزلنا من الباخرة بقينة يوم بأثينا صعدنة باص ٦ ساعات من اثنا لمدينة حدودية اسمهة سالونيك على حدود مقدونيا ومناك تكسي ذبنة اخر نقطة باليونان
مشينة وية گروب كلهم سوريين على الحدود ٣ ساعات من اليونان دخلنة مقدونيا محد تعرضلنا وصلنة محطة القطارت ساعة ٥ الصبح
حوالي ٣٠٠٠ واحد عراقيين سوريين افغان ايرانيين باكستانيين بنغلادش كلهة منتظرة القطار كل ٤ ساعات ويصعدون بس ٥٠ واحد بس ههههه
طبعا الشرطة المقدونية اكبر كلاب أيدهم والدونكي ابد ما يتفاهمون شفنة الشغلة مكيسة(غير جيدة) واذا تريد تصعد باص لازم تاخذ خارطية يالله
من ٩ الصبح لل ٥ العصر يالله حصلنة خارطية طبعاً فتنة مرحلة حرجة متگدر تاكل اي شي بي لحم فاني خلصتهة نساتل وچبس
صعدنة باص من المحطة ب٢٢€ نزلنا على الحدود المقدونية الصربية اول منزلنا اجت سيارة جيش مقدوني دلونه على الطريق شلون نفوت(ندخل) لصربيا
ساعتين بالغابة وصلنة ساعة ١٠ بالليل بدون اي عوائق لگينة الجيش الصربي واگف گال باتوا هنا وباچر ب ٩ الصبح ندخلكم لصربيا
بطرگ القميص درجة الحرارة ١٦ غابة الگاع رطبة نمت اجيف نومة بحياتي عظامي تكسرت من البرد گمنة نحرگ كواغد بس نريد ندفة بس نريد الصبح يطّلع
ساعة ٩ الصبح فوتونة الجيش لگينة باصات تنتظرنا ببلاش لمخيم اللاجئين علمود ننتظر يومين ونحصل خارطية گدرنا بنفس اللحظة نعوف الخارطية ونطلع
ب٤٥€ بباص وصلنا لبلغراد ٥ ساعات رحنة لبيت واحد مهربجي بقيت يمة يوم نمت بفراش دافي ارتاحيت شوية اكلت اكل بي خير غير السنيكرز
ثاني يوم رحت اشتريت قمصلة وبدلت حذائي وطلعنة من بلغراد لحدود الصربية الهنغارية وصلنا لمعمل مهجور بقينة بايتين بي يومين
اجونة ناس جابولنة اكل واحد جاي من سلوفينيا علمود يعرف اكو مهاجرين هنا قطع ٥٠٠ كيلوا بيوم احازتة بس علمود يسوي هيج
وهم رجال چبير جاب سيارة كاملة خبز وبيض ومكاين حلاقة وفرچ أسنان وصابون
اجانة المهرب باكستاني طلعنة بباص نزلنة ع الحدود ومشينة ٣ ساعات لحد ما وصلنا للسياج مال حدود هنغاريا بقينة نحاول نعبر السياج يوم نص
شرطي حرامي نركض ويركضون ورانة طبعا اكل ماكو نگطع عرموط وناكل تصير بطنك سهال تحفر حفرة تخري(تتغوط) وتطمهة حالنة حال الزمايل ههههه
اخير راح يمكن المهرب اتفق وية الشرطة مال هنغاريا ورة ساعة ونص عبرنا ركض بوجهك للغابة لحد ما ابتعدنا شوية وصرنا بعيدين ع السياج ساعة ٢ الظهر
بقينة بالغابة خاتلين لحد ما صارت ساعة ٨ وغربت طلعنة نمشي بحذر لحد ساعة ٩ وصلنة للنقطة بقينة ننتظر اجتنة سيارة بوكس صعدنة بيهة ٣ ساعات
دخلنا للنمسا ورة ربع ساعة من نزلنا لا عدنا نت ولا جي بي اس ومنعرف فيينا بالألماني تنكتب wine هيج شي يمكن تهنة وكل واحد ينطي رأي شكل
طبگت علينة سيارة شرطة كرفتنا كلنا بس اني وبعد ولد من ديالى گدرنا نشرد بقينة خاتلين بمزرعة مال ذرة يومين لا اكل ولا شرب ندور تكسي بالختلة
اخير شي طلعنة كتلنا الجوع والوصخ والتراب گلنة اذا لزمونة خلي يلزمونة ومشينة ساعة وصلنة محطة القطار صعدنة تكسي ١٣٠€ لڤيينا
وصلنا للمركز الاسلامي بوسط ڤيينا اكو جامع دخلنا نغسل بي طلعنة الشيخ طردنا تعارك ويانة ما قبل يفوتنا عدل بدل يمعود ولا قبل
باستغراب وتعجب وصفنات طلعنة من الجامع واحد من الأنبار يگلة …. اختك هسة اروح للكنيسة حتى فندق يگعدوني
إجاني نسيبي أخذني للبيت بس شنو صارلي ١٠ ايام مسابح ولا ماكل شي الوصخ يقرة الف متروس طين وتراب وشغلات مدري شني ما شنو
بس والله التعب والظيم كلة يروح من واحد يشوف ڤيينا
اغلب العراقيين يرحون يا بلجيكا لو فنلندا تبقة عندك بس عقبة ألمانيا وتوصل بسلام وكان الله يحب المسلمين
