تجربتي مع امتحان ال DSH في مدينة أاخن – Aachen Uni RWTH :
طبعاً أول شي في كم قصة لازم نوضحها , وهي انو امتحان ال DSH بالنسبة لطلاب السنة التحضيرية غير مطلوب , بس انا عملتو من باب انو اذا مشي الحال فساعتها ساعات الالماني يلي بالسنة التحضيرية مافي داعي احضرهون وماعد في داعي اعمل امتحان باللغة اخر السنة … يعني هية قصة اختصار للوقت مو أكتر.
بالنسبة للتحضير لل DSH كان بالشكل التالي , انا من بعد ال B1 تركت دراسة بالمعهد وصرت كمل لحالي بالبيت , عملت امتحان B2 ومشي حالو وهلأ عملت امتحان DSH , بس لسا مابعرف شو الوضع … بس عكلن لنشوف شو ممكن يصير معنا , وبالنسبة للتحضير فجبت كتابين جداً ممتازين وهنن :
– Mit Erfolg zur DSH – Übungsbuch (ينصح به بشدة , قواعد ومعلومات للحل)
– Mit Erfolg zur DSH – Testbuch (عادي , نماذج فقط لا غير)
كل الطلاب بيجيبو معهون قواميسهون عل امتحان وبيصير تفتيش عل باب اذا القاموس في لغة تانية مابيسمحو فيه , فلازم يكون ألماني ألماني … انا مالي عرفان انو لازم جيب قاموس , بس ربكون حميد جابولي واحد
– جامعة أاخن من الجامعات يلي جداً قوية بالنسبة كسمعة بألمانيا ومعروفة بقوتها بشكل خاص بالهندسات ومعروفة انو فيها برامج جداً قوية لذوي الاحتياجات الخاصة , وبدها متطلبات عالية غير انو نظام جامعتها بالامتحانات مختلف عن غيرها بشكل كامل وهلشي لح نشوفو هلأ من خلال تجربتي بالامتحان.
– اول قسم السماعي – Horen :
وزعو الأسئلة وعطونا 10 دقايق , بعدين صارت القراءة للنص مع كتابة رؤوس أقلام لكل مقطع عم ينقرأ على شاشة كبيرة بالمدرج , وكان موضوع علمي عن الفيروسات وبعض الأمراض متل الايبولا والملاريا والإيدز وطريقة انتقالهون ومعلومات جانبية عنهون …
بعد قراءة أول مرة عطونا كمان 10 دقايق لحتى نظبط الاجابات يلي قدرنا نلقطها على المسودة او على المبيضة اذا متأكدين منها.
بعدين قرأو النص مرة تانية وعطونا 30 دقيقة لحتى نكتب كلشي إجابات بشكل نهائي.
النص كقراءة بيضل 20 دقيقة تقريباً …
– تاني قسم كان القراءة والقواعد – Leseverstehen :
عطونا 7 أوراق مخروزين ببعض , اول صفحتين كانت النص , والنص كان عبارة عن مقالة علمية بتحكي عن استبدال البشر بلأليات وتوقعات مستقبلية بهاد المجال بلإضافة لشرح بعض النقاط … و 4 صفحات إجابة على الأسئلة , وأخر ورقة كانت للقواعد وهو عبارة عن Umformung لنص كامل , الورقة مقسومة بالنص عل يسار النص العادي وعل يمين النص مع فراغات وانت لحالك بدك تعرف شو بدك تحط بالفراغات (نظام جداً سئيل وصعب).
– استراحة 45 دقيقة …
– أخر قسم كان قسم كتابة الموضوع – Text Produktion :
اجانا رسم بياني كـ Grafik بيحكي عن نتيجة تصويت الأهل لفكرة معينة , وهية إعطاء ال Smartphone للأطفال دون ال 12 سنة و فوق ال 13 سنة وبين ال 11 وال 12 سنة , وعن نقاط معينة بتتعلق بأمان الطفل , تسلية الطفل , امور تانية .. الخ
ومعك 70 دقيقة لتكتب الموضوع .. طبعاً ال 70 دقيقة مو كتار , يعني دوبك تلحق.
بتمنى انو الكل يستفاد من هل تجربة , وراجاءاً لا حدا يسألني عن شي مو متعلق بالموضوع لأنو ماراح اجاوب
موفقين جميعاً …
