تجربتي في ألمانيا وحصولي على قبول الطب البشري
بعد سنتين دراسة طب بشري بجامعة دمشق ولظروف أمنية اضطريت اترك البلد وسافرت على دبي وهنيك بلشت رحلتي إلى المانيا… حصلت على قبول الفيزا بشهر شباط ٢٠١٤ وأجيت على ألمانيا بأخر شهر شباط..
أجيت لحالي ماكنت بعرف حدا بالمدينة يلي فيها المعهد ( بون) سافرت لحالي ووصلت بس كان الحمدلله معي مصاري للإقامة بفنادق لبين مالقيت سكن عند عيلة ألمانية.. من أول ما اجيت وانا ساكن عندن ساعدوني كتير ووقفوا معي..
رسبت بفحص ال dsh سبع مرات لاني كنت عم حاول أعملو وانجح فيه بعد ما اجيت من ست شهور وهادا شي مستحيل بس ضليت مكمل لحتا جبتو..
بالفصل الصيفي ٢٠١٥ قدمت على سبع جامعات اجاني سبع رفوضات..
ضليت قدم لحتا اجاني قبول..
بشهر خمسة جبت الفحص وقدمت على ١٥ جامعة بالمانيا ( معدلي بالمانيا ١.٠٧) اجاني رفض من ١٣ جامعة وقبولين من جامعتين ( بوخوم وماربورغ).
بعد حديثي مع كثير من الجامعات وسؤالي عن سبب رفض هو عدد الطلاب السورين المتقدمين للطب اليشري واصحاب العلامات العالية.. يعني منافسة قوية جدا..
السنه الماضية كان أسهل بكتير..
من شهر خمسه لهلا انا عم اشتغل بمطعم( كرسون) هادا شي خلاني اعتمد على حالي طلع مصروفي ووفر مصاري وقوي لغتي..
وبفضل الله الحمدلله طلعلي مقعد بجامعة ماربورغ وانشالله باول شهر عشرة حانتقل لهنيك مشان كمل دراستي وهدفي يلي اجيت منو على المانيا…
يلي حابب قولوا انو الواحد مالازم يستسلم لازم يضل يحاول.. أجت فترة كرهت حياتي هون بالمانيا ماكان في شي عم يمشي صح بعد سبع مرات رسوب و اكتر من عشرين رفض بس الحمدلله اخر شي تحقق حلمي بقبول جامعة وشغل وتحسنت اموري كتير..
صورة من بعض الرفوضات بلي بعتتلي ياهن الجامعات ماعدا الرفوضات الإلكتروني والرفوضات يلي وصلتني بعد هالصورة
