دى الطريقه اللى بحسب بيها ميزانية السفر لاى دوله ببساطه
تكلفة السفر بتيجى من 5 حاجات:
(1) طيران
(2) فيزا
(3) اقامه
(4) اكل وشرب
(5) فسح وانتقالات
………………………………………..
(1) الطيران :-
لو عاوز تعرف ارخص طيران لارخص دوله فى ارخص ميعاد اعمل الاتى:
ادخل على موقع
www.Skyscanner.com
واختار الطيران من (مصر) الى everywhere
وفى خانة الميعاد دوس whole month
وبعدين دوس cheapest month
مثلا هتلاقى تركيا من ارخص الدول (ب 2800 ج ذهاب وعودة للفرد فى شهر يناير)
# اختيار الدوله
بعد ما شوفت الدوله اللى طيرانها رخيص .. المفروض تشوف بقى الدوله دى عجباك ولا لأ (يعنى فرنسا مثلا فيها متاحف كتيير وحلوه جداا بس انت بتحب الطبيعه وعاوز طبيعه زى تركيا او تايلند أو حياه بريه ونمور واسود زى كينيا وتنزانيا) مثلا
يبقى سعادتك هتروح على جوجل وتكتب “السياحه فى تركيا” أو اى دوله
او بالانجليزى
Tourism in Turkey
ومن الصور هتشوف الدوله دى عجباك وهى الاستايل بتاعك ولا تشوف غيرها
………………………………………..
(2) الفيزا :-
بعد ما حددت خلاص الدوله اللى انت رايحلها بناء على سعر تذكرة الطيران وعجبتك السياحه فيها .. لو الدوله من غير فيزا يبقى زى الفل
لو الدوله هتحتاج فيزا يبقى هتبذل مجهود شويه فى كشف الحساب
ادخل على موقع السفارة بتاعتهم وشوف تكلفة الفيزا اد ايه و الورق المطلوب وخاصة كشف الحساب ايه المطلوب فيه بالظبط
سعادتك هتفتح حساب وتعمل حركه فى الحساب لمدة 3 او 6 شهور (حسب المطلوب على موقع السفاره) يعنى هتعمل سحب وايداع عشان كشف الحساب يبقى فيه حركه
والرصيد النهائى ساعت ما تطلع كشف الحساب يبقى حوالى من 15 ل 30 الف حسب الدوله
زى ما قولت لو دوله من غير فيزا الموضوع هيبقى اسهل بكتير .. ابحث على جوجل عن “دول بدون فيزا للمصريين”
فيزا تركيا على سبيل المثال تكلفتها تقريبا ٢٠٠٠ ج للفرد
………………………………………..
(3) الاقامه :-
احسن موقع تدور عليه هو
www.booking.com
بص فنادق السبع والخمس نجوم بتبقى غاليه عشان الخدمات والراجل اللى بيجيلك كل يوم الصبح ب عربية اكل وياخد بقشيش 😂
فا فكك منها .. ممكن والله تقعد فى مكان نضيف او جيست هاوس قريب من الخضره وتبقى مبسوط جدا ومش هتدفع كتير
عشان تلاقى حاجه زى كدا هتفتح موقع booking
وتختار الدوله او المدينه وتختار الميعاد (هتبقى حددته فى خطوة الطيران)
بعد ما يجيبلك نتيجة البحث .. بدون تفكير دوس على كلمة sort او ترتيب
واختار أنه يعرضلك الفنادق من الارخص للاغلى
هتلاقيه جابلك الفنادق والهوستلز الرخيصه الاول
اهم ٣ حاجات تبص عليهم بقى هما
١- السعر
٢- التقييم (بلاش اقل من ٧ أو ٦.٥)
٣- بعد الفندق او الهوستل عن ال city centre
الفندق كل ما يبقى قريب من مركز المدينه الانتقالات هتبقى سهله جداا بالنسبالك
وياريت تقرأ تقييمات الناس على الفندق قبل ما تحجز
………………………………………..
(4) الاكل والشرب :-
((متوسط من 100 ل 150 ج مصرى للفرد فى اليوم ))
ازاى ياعم ؟!!
بص انا باخد معايا من مصر الفطار والعشا اللى يكفينى فترة سفرى
باخد مثلا (مربى – حلاوة – جبنه – تونه – تمر – خيار – الخ …)
كل دا مش هيكمل 300 ج للفرد فطار وعشا ل ١٠ ايام وابقى اشترى العيش هناك (يعنى 30 ج فطار وعشا للفرد فى اليوم)
وعلشان تعرف قيمة الموضوع : علبة جبنة بريزدو ٨ قطع (فى مصر ب ٨ ج) لما روحت هونج كونج لقيتها ب ٣٥ ج 😂
بالنسبه للغدا بقى هتلاقى ماك وكنتاكى و اى فرانشايز سعره فى المعقول
وجبة ماك فى ماليزيا مثلا ب 60 ج للفرد وفى هونج كونج ب 80 ج
اعرف تكلفة الوجبه فى اى بلد وتكلفة المعيشه من الموقع دا
www.numbeo.com
ولو فى يوم هتتغدا سى فوود مثلا ممكن متوسط من ١٠٠ ل ٢٠٠ ج الوجبه للفرد حسب الدوله
## الخلاصه تكلفة ال 3 وجبات من 100 ل 150 ج للفرد فى اليوم
………………………………………..
(5) الفسح والانتقالات :-
دى بقى بتفرق من شخص للتانى ومن دوله للتانيه بس لو عاوز متوسط
مثلا فى ماليزيا الانتقالات ممكن 70 ج مصرى تكفي الفرد ف اليوم
والفسح متوسط من 100 ل 300 ج مصرى فى اليوم ويمكن اعلى حسب كل شخص (الباراشوت والاكتيفيتيس وكده بتبقى غاليه بحسها فى مصر ارخص بكتير) فا ممكن تقضيها لف وتمظبط نفسك ب حاجات مش غاليه (مثلا هايكينج فى الجبال مش هيكلفك حاجه)
اكتر موقع هيفيدك فى اماكن الفسح والسياحه فى اى دوله هو
www.tripadvisor.com
## الخلاصه لو عاوز تمشى نفسك باقل حاجه للفسح والانتقالات ممكن ب 150 ج للفرد فى اليوم
………………………………………..
** المواقع والابليكشنز المهمة فى السفر:
1- Flight Tickets:-
– Skyscanner.com اهم واحد
– Cheap flights
– Momondo
– Expedia
2- Hotels:-
– Booking.com اهم واحد
– Airbnb
– Couchsurfing
– Hostel world
– Hostelbookers
3- Transportation & maps
– Rome2rio اهم ابليكشن
هيجيبلك الوسائل المتاحه للانتقال من مكان للتانى .. مثلا هيقولك التاكسى كذا والاتوبيس بكذا والمترو بكذا (مهم جدااا وانا شخصيا بستخدمه كتيير)
– Google Maps اساسى طبعا
– Here maps
4- Others
www.Tripadvisor.com
هتعرف منه اماكن الفسح وصور وتفاصيل ليها وسعرها كمان
www.numbeo.com
هيجيبلك تكلفة كل حاجه فى اى دوله زى مثلا تكلفة وجبة ماك او سعر علبة الجبنه فى الدوله دى بكام
www.Checkmytrip.com
للتأكد من حجز تذكرة طيرانك بعد ما تحجزها
يلا قوموا سافروا بقى 😂
البوست منقول للامانه
والصورة عجبتني 🙂
