اجتياز امتحان ‫B2 Telc‬ في ألمانيا

ليوم اجت نتيجتي والحمد الله نجحت فيه …
طبعاً الفحص ساويتو لأنو ناوي كمل عل DSH , فلازم اخد شهادة ال B2 لأنو أغلب الجامعات بتطلبو.
من بعد الفحص تبع ال B1 مافتت معهد وكملت لحالي باللغة , وبهل بوست لح احكي عن بعض القصص يلي ركزت عليها , ولح احكي عن الفحص إجمالاً وترتيبو وخطواتو …

[ad id=”1308″]
– التحضير للفحص :
* فحص ال B2 يعتبر من الفحوصات يلي مو سهلة , لأنو يعتبر صلة الوصل الاساسية مع ال DSH , يعني اهم شي بهاد المستوى انك تركز عل قواعد الاساسية ويلي هية ال Dativ وال Akkusativ مع حروف الجر (هل قصص بتضل معك طول عمرك باللغة) , بلإضافة طبعاً لكلشي قواعد اخدتها سابقاً بالصفوف الماضية.
*بهاد الفحص بما انو فيه توسع , فمعناتا الكلمات صار عددها اكبر , فلذلك لازم تحفظ كتير من الكلمات ومعانيهون لأنو النصوص يلي لح تجي مو هينة بنوب وبدها شغل منيح.
* الموضوع السماعي بهاد المستوى بدو شغل وتركيز منيح , نصيحتي لكل واحد , سماع تلفزيون اد مافينك ولو ماعم تفهم عليه , او اذا مابدك تلفزيون سماع راديو .. كتير ضروري انك تسمع الكلام الالماني العادي ويلي بيكون سريع نسبة ليلي بيجي بالفحص , لحتى تلاقي السماعي يلي بالفحص سهل , ولا تنسا انو مستقبلاً الالماني مالح يحكي معك بشكل بطيء لحتى تفهم , فلازم تعوّد حالك من هلأ.
* النصيحة الاخيرة .. القراءة ثم القراءة ثم القراءة … جداً مهمة انك تقرأ شغلات تانية غير منهاجك , لحتى تتعلم عل اسلوب وتتعلم كلمات جديدة , باعتبار الفحص في كتابة موضوع اصعب نسبياً من ال B1 , فبيلزمك يكون عندك عدد منيح من الكلمات لتقدر تستخدمها بجمل مفيدة.

[ad id=”1308″]

– الفحص وخطواته :
* أول شي سجلت بالفحص بمعهد ilingue Hannover , وكان رسم الفحص 205 يورو , 175 رسوم الفحص , و30 رسوم تأخير عن وقت التسجيل (انا قررت قدم
الفحص على غفلة وكان خالص التسجيل)
* الفحص كان عبارة عن 4 اقسام , وبلشنا بأول قسم الساعة 1
* القسم الأول – الفحص الشفهي (20 دقيقة تحضير – 30 دقيقة فحص)
هاد الفحص كان مقسوم ل 4 اقسام , القسم الأول كان تعريف عن كل واحد , والقسم التاني كان عبارة عن الحديث مع الطلاب (كنا 3 طلاب بالقاعة) عن فلم او كتاب او رحلة كان\ت مميزة , وشو السبب انو كانت مميزة بالنسبة لكل طالب , والقسم التالت كان عبارة عن قراءة نص ومناقشة النص واذا في حلول او اراء ممكن تضيفها عل نص , والفسم الرابع والاخير كان عبارة عن مشكلة ولازم تحلها بالتعاون مع الطلاب يلي موجودين معك.

* القسم الكتابي (90 دقيقة فحص)
بهل قسم هاد في شغل خيرات الله بسبب التنوع يلي فيه … كان في سؤالين فراغات لمفردات وحروف جر وكلمات تانية مختلفة , وكان في نصوص مختلفة بدك تلاقيلها عناوين مناسبة , وكان في اختيار من متعدد.

* القسم السماعي (مدتو 30 دقيقة تقريباً)
هاد القسم مؤلف من 3 اقسام , وكل قسم بيحوي اقسام مختلفة , الفكرة انك بتسمع جملة معينة بالمسجلة ولازم تعرف اذا هل جملة يلي سمعتها بتتوافق مع الشي يلي مكتوب عل ورقة او لأ .. يعني صح او خطاً

* القسم الاخير ويلي هو كتابة الموضوع (مدتو 30 دقيقة)
بهاد القسم بيجيك خيارين , إما انك تكتب رسالة رسمية او رسالة غير رسمة , طبعاً بيجوز بالنماذج التانية يجي خيارات مختلفة.
انا اجاني رسالتين , إما انك تكتب رسالة بهدلة لشركة وعدتك ببرنامج سياحي معين وطلع البرنامج مو متل ماوعدوك , او انك تكتب رسالة تستفسر فيها عن برنامج سياحي معين وتسأل عن بعض النقاط يلي حابب انك تعرفها (الاسعار , المخطط , اعمار الاشخاص يلي بالغروب .. الخ) وطبعاً كل موضوع عاطينك فيه 4 نقاط , لازم تذكر منها 3 نقاط او انك تذكر نقطتين وتجيب نقطة تالتة من عندك.

الفحص بشكل عام كلو كانت مدتو تقريباً شي 4 ساعات ونص وكان في استراحة بين الفحص الكتابي والفحص الشفهي مدتها 20 دقيقة , وطبعاً الفحص بجد مرهق لأنو في شغل منيح ومتواصل.

موفقيين جميعاً …